DAR ES SALAAM
Na Mwandishi wetu
Mwadhama Polycarp Kardinali Pengo, Askofu Mkuu Mstaafu wa Jimbo Kuu Katoliki la Dar es Salaam, amawasihi Wakatoliki kuacha woga kumtangaza Yesu Kristo, kwa sababu imani ndiyo inayowasaidia maishani.
Kardinali Pengo alitoa wito huo wakati akihubiri katika Adhimisho la Misa Takatifu ya kutoa Sakrameti ya Kipaimara kwa vijana 25, wa Parokia ya Mtakatifu Andrea Mtume, Bahari Beach.
“Ndugu zangu Waamini nawaomba sana, huyu Kristo tuko naye, kwa hiyo kama yupo anayejifichaficha, aache tabia hiyo, tumtangaze Kristo, ili na yeye atusaidie katika maisha yetu:
“Utakuta watu wengine ni Wakristo wazuri sana, lakini wanapenda kuwa na tabia ya kujificha,” alisema Kardinali Pengo.
Alisema kuwa hata wakati wa kula chakula, hawapigi ishara ya msalaba, hawasali kabisa kwa sababu ya woga.
Kardinali Pengo alibainisha kuwa tabia ya Mkristo kuwaogopa watu wakati wa kuombea chakula, haifai, kwani Mkristo kamili hatakiwi kumwogopa mtu, bali anatakiwa kumtangaza Bwana Yesu Kristo mahali popote pale.
Aidha, Kardinali Pengo aliwataka vijana waliompokea Roho Mtakatifu kupitia Sakramenti hiyo kutokuwa na woga, wakamtangaze Yesu katika maisha yao.
Aliwakumbusha vijana hao kufahamu kwamba kupitia Sakramenti hiyo, wamekuwa Askari imara wa Kristo, hivyo wanatumwa kwenda kumtangaza yeye.
Kardinali Pengo alisema kuwa imani ndiyo msingi wa maisha ya kila mmoja, akiwasihi Waimarishwa hao kusali kila wakati, kwani kwa kufanya hivyo, Ufalme wa Mungu utakuwa wokovu kwao.
Kardinali aliwashukuru Waamini wa Parokia ya Bahari Beach kwa zawadi walizompatia, huku akiwapongeza kwa hatua kubwa waliyopiga parokiani hapo, ikiwemo ujenzi wa kanisa, akisema kuwa anatamani kuona ujenzi huo ukimalizika mapema, ili na yeye afike tena kwa ajili ya kusali pamoja na Waamini hao parokiani hapo.
Kwa upande wake Paroko wa Parokia hiyo, Padri Marko Loth alimshukuru Kardinali Pengo kwa kuwapatia Sakramenti vijana hao.
Naye Mwenyekiti wa Parokia hiyo, Balozi Dk. James Msekela alisema kuwa hiyo ni siku kubwa kwao kwa kutembelewa na Kardinali Pengo, akiwaomba
Waamini wa Parokia hiyo kuongeza ushirikiano ili wamalize ujenzi wa kanisa lao kwa wakati uliokusudiwa.
Dar es Salaam
Na Mathayo Kijazi
Wazazi nchini wametakiwa kutambua kwamba namna wanavyoishi, na watoto wao pia wataishi kama wao.
Ili waweze kufuata maisha mema, wazazi hao wametakiwa kuishi maisha ya unyenyekevu na yenye kumpendeza Mungu, kwani watoto huiga mambo wanayofanya wazazi wao.
Hayo yalisemwa hivi karibuni na Askofu Msaidizi wa Jimbo Kuu Katoliki la Dar es Salaam, Mhashamu Stephano Musomba wakati akitoa homilia yake katika Adhimisho la Misa Takatifu ya kutoa Sakramenti ya Kipaimara kwa vijana 158, wa Parokia ya Mtakatifu Monica, Matosa, jijini Dar es Salaam.
“Kwa hiyo, jinsi mnavyoishi ninyi wazazi, ndivyo watoto wenu watakavyoishi, kwa sababu hatua ya kwanza ya watoto, ni kuiga yale yanayofanywa na wazazi wao,” alisema Askofu Musomba.
Katika homilia yake Askofu huyo, aliwataka wazazi kuwaonyesha njia watoto wao, ili wafahamu namna ya kuwasiliana na Mungu katika maisha yao.
Aidha, Askofu Musomba aliwasisitiza wazazi hao kuwategemeza na kuwalinda watoto wao dhidi ya mashambulizi mbalimbali yaliyopo, ili wasiharibike katika ulimwengu huu.
Aliwasihi Waimarishwa wa Sakramenti Takatifu ya Kipaimara kutokuwa na hofu wala woga, kwani Roho Mtakatifu waliyempokea kupitia Sakramenti hiyo, atawapa nguvu ya kuyashinda majaribu wanayokutana nayo kila wakati.
Askofu Musomba aliwataka vijana hao kutosikiliza kelele zilizopo katikati yao, bali waisikilize sauti ya Kristo pekee.
Wakati huo huo, Askofu Musomba aliwaasa vijana hao kuwa wanyenyekevu katika maisha yao, kwani ndio utakaowasaidia kuisikia sauti ya Kristo katika maisha yao.
DAR ES SALAAM
Na Happiness Mthathia-TUDARCO
Serikali imesema kwamba imejipanga kupunguza kero ya usafiri kwa wanafunzi jijini Dar es Salaam, kwa kutekeleza mikakati iliyojiwekea, ikiwemo kutumia usafiri wa mabasi yaendayo haraka (Dar es Salaam Rapid Transit: DART) na Treni.
Hayo yalisemwa na Alhaji Maulidi, Afisa Elimu wa Mkoa wa Dar es Salaam wakati akizungumza na gazeti Tumaini Letu katika mahojiano maalum yaliyofanyika ofisini kwake jijini Dar es Salaam, kuhusu kero ya usafiri kwa wanafunzi.
“Serikali inaendeleza ujenzi wa barabara za mabasi yaendayo haraka, ikiwemo barabara iendayo Gongo la Mboto kutoka mwanzo wa Barabara ya Nyerere, Msimbazi, Kariakoo. Pia, ina mkakati wa kujenga barabara kutoka Morocco (Kinondoni) kwenda Tegeta, na itafika mpaka Bunju ili kuwasaidia wanafunzi,” alisema Maulidi.
Alisema pia kuwa mpango wao ni kushirikisha sekta binafsi katika kutatua changamoto ya usafiri kwa wanafunzi jijini Dar es Salaam, kwani kwa sasa hali ni nzuri ikilinganishwa na ilivyokuwa katika miaka ya nyuma.
Maulidi alisema kuwa jukumu la Serikali kwa wanafunzi ni kuwapatia elimu bora, na kuongeza kuwa wazazi wana jukumu la kuhakikisha watoto wanafika shuleni na kurudi nyumbani kwa kuwapatia nauli kwa ajili ya usafiri.
Afisa huyo aliwataka makondakta kuwahudumia wanafunzi waweze kusafiri kwa wakati ili kupunguza changamoto wanayokumbana nayo, na kuwakanya wanafunzi nao ili wajiheshimu.
Baadhi ya wanafunzi wameliambia gazeti hili kwamba wamekuwa wakikabiliwa na changamoto kubwa ya usafiri nyakati za asubuhi na jioni kwa kukataliwa na makondakta wa daladala, na hivyo kuchelewa kwenda shule na kurejea nyumbani.
Mmmoja wa wanafunzi hao, John Elias wa Shule ya Sekondari Kawe Ukwamani jijini Dar es Salaam, alisema kuwa wanakumbana na changamoto hiyo mara kwa mara.
“Tumekua tukikataliwa na makonda kuingia kwenye daladala kitu ambacho kinasababisha tuchelewe kufika shule pia kurudi nyumbani nyakati za jioni,’’ alisema John.
Kwa upande wao baadhi ya wazazi akiwemo Mama Jordan, Mkazi wa Mtaa wa Goba jijini Dar es Salaam, alithibitisha kuwepo kwa changamoto hiyo kwa wanafunzi, akisema kuwa sababu ya makondakta kuwakwepa wanafunzi ni kiasi cha nauli wanacholipa cha Shilingi 200/=, hivyo wanaona bora wanafunzi waachwe.
DAR ES SALAAM
Na Deus Kamanga
Waamini wametakiwa kuendelea kuunga mkono jitihada za Kanisa katika kufanikisha maendeleo kwa vyombo vya Habari vya Kanisa ili viweze kufikisha ujumbe wa Mwenyezi Mungu kwa watu wote Ulimwenguni, kwani kwa kufanya hivyo watajipatia neema na baraka kwa Mungu.
Wito huo ulitolewa hivi karibuni na Padri Vitalis Kassembo, Mkurugenzi wa Walei Jimbo Kuu Katoliki la Dar es Salaam wakati akitoa homilia katika Adhimisho la Misa Takatifu ya Shukrani ya Umoja wa Marafiki wa Tumaini Media (UMTUME), kuadhimisha Siku ya Mawasiliano Duniani iliyofanyika Parokia ya Bikira Maria Mama wa Fatima – Msimbazi, jijini Dar es Salaam.
Padri Kassembo ambaye pia ni Paroko wa Parokia ya Familia Takatifu - Mburahati, jimboni humo, alisema kuwa Kituo cha Tumaini Media jimboni Dar es Salaam, ni miongoni mwa vyombo vya Habari ndani ya Kanisa kinachofikisha ujumbe wa Mungu kwa watu, kikielimisha na kuhabarisha masuala mbalimbali ya kijamii yanayostawisha maelewano mazuri yenye kuleta mshikamano unaompendeza Mungu.
Padri Kassembo alisema kuwa jitihada zinazofanywa na Utume kwa ajili ya maendeleo ya Tumaini Media ni mfano dhahiri kwa waamini na watu wenye mapenzi mema na Kituo hicho cha Kanisa, hivyo akawataka waamini na watu wengine kuiga mfano huo kwa kuendelea kumshukuru Mungu, sanjari na kukichangia ili kisonge mbele.
Aliongeza pia kuwa ni jambo la msingi kwa kila mbatizwa kushirikiana na Kanisa na Taasisi zingine zenye nia njema ya kuviwezesha vyombo hivyo, wakiwemo UMTUME, kwa hali na mali kwa kuwa kufanya hivyo ni kujiwekea hazina mbinguni.
Awali Mkufunzi wa semina ya Umtume, Maalim Jeran Mushi aliwaasa Wanaumtume kudumisha upendo na umoja katika kutekeleza utume wao, kwa kutawaliwa na upole, unyenyekevu, hekima na amani.
Maalim Mushi alibainisha kuwa Wanaumtume wanapaswa kuwafikia watu wote katika hali ya unyenyekevu kwa kuwashirikisha lengo la kuisadia Tumaini Media kiuchumi, na kuacha tabia ya kukata tamaa kwa sababu Mungu Mwenyezi anaziona nia zao, na hawezi kuwaacha katika magumu yoyote.
Alifafanua kuwa kiasi hicho cha fedha kitaelekezwa kufanyia maboresho eneo la mapokezi katika ofisi za Tumaini Media, na wataendelea na maboresho kulingana na uhitaji wa maeneo mengine.
DAR ES SALAAM
Na Esther Ngubes-TURDACO
Kamishna Msaidizi wa Polisi Kanda Maalum ya Dar es Salaam, Michael Stephen Deleli, amesema kuwa ajali nyingi za bodaboda, zinatokana na usimamizi mbovu wa wamiliki wa vyombo hivyo, kutokana na baadhi yao kuwapa madereva wasio na weledi.
Akizungumza na gazeti Tumaini Letu katika mahojiano maalumu yaliyofanyika jijini Dar es Salaam, Kamishna Deleli alisema kuwa wamiliki wengi wa bodaboda hawawasimamii vema watu wanaowapa pikipiki hizo ikiwemo kutozingatia kama wana leseni ama laa.
Aidha, alisema kuwa jambo lingine ni woga wa abiria kushindwa kuwaonya madereva pindi wanapotumia usafiri huo, hasa wanapokwenda mwendo kasi, na uwezekano wa kusababisha ajali.
“Katika tathmini yetu, tumegundua kuwa ajali nyingi hususan za bodaboda, zinasababishwa na ukosefu wa usimamizi wa vyombo hivyo vya usafiri kutoka kwa wamiliki wakuu…
“Pia, woga wa abiria pindi wanapotumia usafiri huo kwa kushindwa kuwaonya madereva wanapoendesha kwa mwendo kasi, hii ni kutokujua wajibu na haki zao za kimsingi wanapokuwa barabarani,” alisema Kamishna Deleli.
Alibainisha pia kuwa takwimu zinaonyesha kwamba ajali nyingi zinatokana na miundombinu mibovu ya barabara, ubovu wa vyombo vyenyewe vya usafiri, pamoja na makosa ya kibinadamu yanayosababishwa na ukosefu wa elimu kuhusu matumizi sahihi ya barabara kwa kuzingatia Sheria za Usalama Barabarani.
Aidha, Deleli alisema kuwa kulingana na makosa hayo, baadhi ya madereva huvunja sheria kwa makusudi kutokana na sababu za kumchelewesha abiria, na sababu nyingine binafsi.
Alisema kuwa Jeshi la Polisi Kikosi cha Usalama Barabarani kimeweka mikakati madhubuti ili kuhakikisha ajali za barabarani zinapungua kwa kiasi kikubwa, hususani ajali za pikipiki, ikiwemo kutoa elimu kwa madereva wa pikipiki kwa kuweka sheria kali zitakazosaidia kupungua kwa ajali hizo.
Kamishina Deleli alisema kuwa miongoni mwa adhabu hizo ni kifungo au faini kwa yeyote atakayejihusisha na uvunjifu wa sheria hizo.
“Natoa rai kwa wananchi wote, madereva, na wamiliki wakuu wa vyombo hivyo vya usafiri, hususani pikipiki, wahakikishe kuwa vyombo hivyo vya usafiri vipo katika mikono salama ya madereva hao.
“Nasisitiza sana kwa madereva wa pikipiki kujiepusha na uendeshaji wa mwendokasi, kuvaa kofia ngumu (helmet), kujiepusha na upakiaji hatarishi wa abiria zaidi ya mmoja, na uendeshaji wa pikipiki ukiwa umetumia kilevi au afya ya mwili ikiwa haipo vizuri,” alisema Kamishna Deleli.
Akizungumza na Tumaini Letu, mmoja wa madereva wa pikipiki aliyejitambulisha kwa jina la Temu, alisema kuwa Sheria za Usalama barabarani wanazifuata, lakini kutokana na makosa ya kibinadam na baadhi ya changamoto zinakuwa nje ya uwezo wao, hujikuta wakisababisha ajali hizo.
DAR ES SALAAM
Na Angela Msele
Askofu Mkuu wa Jimbo Kuu Katoliki la Dar es Salaam, Mhashamu Jude Thaddaeus Ruwa’ichi amewausia Waamini na watoto kuacha dhambi ya wivu, kwani itawasababishia kupata ukoma wa kiroho.
Amewakumbusha Waamini kufahamu kwamba Agosti 8 kila mwaka, ni siku ya kumuenzi Mtakatifu Dominiko aliyeishi karne ya 13, ambaye ndiye mwanzilishi wa Shirika la Dominiko.
Askofu Mkuu Ruwa’ichi aliyasema hayo hivi karibuni wakati akihubiri katika Adhimisho la Misa Takatifu ya Shukrani kwa Mungu kwa safari za Kitume za Watoto wa Shirika la Kipapa la Utoto Mtakatifu Jimbo Kuu Katoliki la Dar es Salaam walizozifanya katika Jimbo Katoliki la Kondoa mkoani Dodoma na Utete mkoani Pwani, iliyofanyika Parokia ya Bikira Maria wa Fatima – Msimbazi, jimboni Dar es Salaam.
“Tunakuwa wakoma wa kiroho pale tunapochukiana na kuoneana wivu, na tunapofanya mambo mabaya yanayowaumiza wenzetu,”alisema Askofu Rua’ichi na kuongeza;
“Yesu anatufundisha Neno la Mungu, yeye ambaye ni Neno wa Mungu, kwa upendo wake alifufua wafu, aliwaponya wagonjwa na kulisha wenye njaa…daima tunatakiwa kuwa watu wa sala, kwa sababu hata Yesu ambaye ni mwana wa Mungu, alisali.”
Askofu Mkuu Ruwa’ichi alibainisha kuwa sala ni mahusiano kati ya binadamu na Mungu, inayowaunganisha wanadamu na Mwenyezi.
Naye aliyekuwa Mkurugenzi wa Mashirika ya Kipapa Taifa (PMS), Padri Jivitus Kaijage, alimshukuru Mungu kwa kumaliza salama muda wake wa utume katika nafasi hiyo, akimshukuru Askofu Mkuu Ruwa’ichi kwa ushirikiano wake katika kipindi chote cha miaka 12 ya kuwa Mkurugenzi wa mashirika hayo.
Kwa upande wake Padri Alfred Gwene, Mkurugenzi mpya wa PMS,Taifa, aliwataka walezi kuwafundisha sala watoto hao na kuwafanya washiriki shughuli zote za kimisionari.
Kwa upande wake Mwenyekiti wa Walezi wa Utoto Mtakatifu Jimbo Kuu Katoliki la Dar es Salaam, Cletus Majani, alimshukuru Askofu Mkuu Ruwa’ichi kwa kuwapa ruhusa ya kushiriki Makongamano yote yaliyofanyika katika Majimbo hayo.
Aliongeza kuwa Kongamano la Utoto Mtakatifu lililofanyika Utete mkoani Pwani, lilizaa matunda kwa kupata kijana wa Kidato cha Pili kutoka Dini nyingine, ambaye aliomba kubatizwa ili awe Mkatoliki, ambaye tayari ameanza mafundisho, kwa ruhusa ya wazazi wake.
Katika misa hiyo parokia 10 bora zilizotoa idadi kubwa ya watoto katika Makongamano hayo, zilipoongezwa na kuzawadiwa vyeti.
DAR ES SALAAM
Na Mathayo Kijazi
Askofu Mkuu wa Jimbo Kuu Katoliki la Dar es Salaam, Mhashamu Jude Thaddaeus Ruwa’ichi, amesema kuwa jamii isipobadilika na kuwekeza katika maadili mema kwa watoto wao, Ulimwengu utawateka.
Askofu Mkuu Ruwa’ichi alisema hayo katika Adhimisho la Misa Takatifu ya kutoa Sakramenti ya Kipaimara iliyokwenda sanjari na Kutabaruku Kanisa la Parokia ya Kung’ara kwa Yesu Kristo, Mbezi Mshikamano, iliyokuwa ikifahamika awali kama Parokia ya Mtakatifu Yohane Paul II, Mbezi Mshikamano.
Aidha, Askofu Mkuu Ruwa’ichi alimwagiza Paroko wa Parokia hiyo kuhakikisha watoto wote walioimarishwa wanatengenezewa utaratibu mzuri wa kuendelea na mafunzo ya Imani Katoliki, ili waweze kuimarika zaidi katika Imani hiyo.
Wazazi na walezi walikumbushwa pia kufahamu kwamba kwa sasa Dunia imekengeuka, hivyo ni wajibu wao kuhakikisha kwamba wanawekeza Imani kwa watoto wao, kwani kwa kushindwa kufanya hivyo, Ulimwengu utawekeza kwa watoto hao, na hivyo watapotezwa.
“Wekezeni maadili mema kwa Watoto wenu, hasa katika wakati huu ambapo dunia hii imemezwa na mambo mabaya kwa sababu msipowekeza sasa, dunia itawekeza kwako,” alisema Askofu Mkuu Ruwa’ichi.
Askofu Mkuu aliongeza kuwa hali ya maisha ya Dunia hasa katika suala la maadili, limekuwa baya akiisihi jamii kuwalea watoto katika misingi thabiti ya kiimani, ili watoto hao wasije kutekwa na Ulimwengu.
Awali katika homilia yake Askofu Mkuu Ruwa’ichi, aliwasisitiza Waamini hao kuwa kama walivyojenga kanisa zuri, wanatakiwa pia kuwa wazuri na wenye kujaa neema kutoka ndani ya mioyo yao.
“Wewe ni kanisa, wewe ni hekalu, wewe ni makao ya Roho Mtakatifu. Sasa kama mmejenga kanisa zuri, hebu kwanza muanze ninyi wenyewe kuwa wazuri. Muanze kujifunza kuwa watu mliojaa neema. Msiruhusu Mioyo yenu, akili zenu, dhamiri zenu, na nafsi zenu zijae masizi ya dhambi,” alisema Askofu Ruwa’ichi.
Aidha, aliwakumbusha Waamini wa parokia hiyo kufahamu kwamba kanisa na altare vinapopakwa mafuta ya Krisma, vinakabidhiwa mikononi mwa Mungu ili aviweke rasmi kwa ajili ya mambo yanayomhusu Yeye na watu wake.
Askofu Mkuu aliwataka Wakristo hao kulitumia kanisa hilo kwa ibada stahiki na kwa heshima inayostahili, akiwaonya wale wasioelewa kwamba wako wapi, watambue wako mahali patakatifu.
DAR ES SALAAM
Na Mathayo Kijazi
Imeelezwa kuwa Mungu ameumba uoto wa asili, maji, na viumbe malimbalimbali duniani ili visiharibiwe, kwani chanzo cha kutoka kwa mabadiliko ya tabianchi ni kuharibiwa kwa mazingira.
Hayo yalisemwa hivi karibuni na Askofu Mkuu wa Jimbo Kuu Katoliki la Dar es Salaam, Mhashamu Jude Thaddeus Ruwa’ichi wakati akihubiri katika Adhimisho la Misa Takatifu ya kutoa Sakramenti Takatifu ya Kipaimara kwa vijana 42 wa Parokia ya Mtakatifu Yohane Mbatizaji – Msongola ‘B’, jimboni humo.
“Mnaposikiliza taariba ya habari, au mnaposoma kwenye magazeti, na kwenye vilongalonga vyenu, mnaona mahali pengi kuna habari juu ya Tabianchi. Hayo mabadiliko ya tabianchi yanamuumiza mwanadamu, yanaviumiza viumbe, yanatusambaratisha,” alisema Askofu Mkuu Ruwa’ichi:
“Sasa hayo mabadiliko ya tabianchi hayakutokea hivi hivi, kuna mkono wa mtu. Sasa msiseme kwamba Askofu anashabikia uchawi, ninaposema kuna mkono wa mtu, sina maana kwamba kuna mchawi, kama kuna mchawi ni sisi, yaani mimi na wewe. Mkono unaovuruga nchi na kufanya kuwe na mabadiliko holela, ni mkono wa mwanadamu mvurugaji, mwanadamu mchafuaji.”
Askofu Ruwa’ichi aliwasisitiza kuwa Wakristo wanatakiwa kutodhoofisha uoto wa asili ulioumbwa na Mungu, akisema, “Mnatambua kwamba pale mlipofyeka mkaondoa uoto wa asili, pamedhoofika. Kwa hiyo Mungu aliyeumba uoto wa asili, aliyeumba miti, aliyeumba maji, aliyeumba majani, aliyeumba wanyama na ndege, ametaka vitu hivi vitumiwe kwa utaratibu kusudi vimhifadhi mwanadamu kwa vizazi vyote.”
Aliongeza kuwa sehemu yoyote yenye joto kali lililopitiliza, hakuna mwanadamu anayeweza kuishi wala kustahimili hapo, hivyo yeyote anayevuruga na kuharibu mpangilio huo wa asili, anajitakia maangamizi.
Wakati huo huo Askofu Mkuu Ruwa’ichi aliwasisitiza Waamini kujenga urafiki na maumbile, akiwataka kuyaratibu, kuyatumia kwa uangalifu na staha kama Mwenyezi Mungu alivyoagiza.
Kwa mujibu wa Askofu Mkuu, Waamini wanapaswa kuwa na mahusiano mazuri kati yao na Mungu, akiwasihi wapende kujenga mahusiano safi, hai, na yenye tija na Mungu wao, kwani wakitenda hivyo, watakuwa wanajitahidi kuzingatia anayotaka Mungu.
Wakati huo huo, Askofu Mkuu huyo aliwaasa waamini daima kuwa watu wa amani, wakiwa viumbe wenye kupendana na kusaidiana, badala ya kusakamana.
Awapa darasa Waimarishwa
Akizungumzia kuhusu Waimarishwa hao, Askofu Mkuu Ruwa’ichi aliwataka vijana hao kufahamu kwamba wanapompokea Roho Mtakatifu, wanakamilishwa, na hivyo wanatumwa kuifanya kazi ya kuitangaza Habari Njema kwa watu wote.
Paroko na Paroko Msaidizi, kwa kushirikiana na wazazi parokiani hapo, waliagizwa na Askofu Mkuu Ruwa’ichi kuendelea kuwapatia mafunzo ya kiimani vijana hao ili wakue katika misingi yenye maadili mema.
Dar es Salaam
Na Salum Mgweno-SJMC
Soko la Kilamba katika Manispaa ya Temeke jijini Dar es Salaam, limegeuka gofu baada ya kutelekezwa na wafanyabiashara kwa takriban miaka miwili.
Moja ya sababu za kulikacha soko hilo ni ubovu wa barabara, hali inayowalazimu wananchi wa maeneo hayo kutembea umbali mrefu kufuata mahitaji yao katika masoko ya mbali.
Akizungumza na Tumaini Letu, Mwenyekiti wa Serikali ya Mtaa wa Kilamba Nzasa B, Hassan Ugando alisema kuwa soko hilo lenye vizimba takribani, 72, lilianzishwa tangu mwaka 2005 kwa gharama ya Shilingi milioni 100, ambapo Shilingi milioni 80 ni kutoka Halmashauri ya Manispaa ya Temeke, huku Shilingi milioni 20 zikiwa ni nguvu za wananchi, limekuwa likitumika msimu kwa msimu na kisha kutelekezwa, ambapo kwa mara ya mwisho kutumiwa na wafanyabiashara ilikuwa mwaka 2021.
“Mwaka 2020 kwenda 2021, bado kulikuwa na wafanyabiashara kadhaa ambao pia waliondoka. Kwa hiyo kama unavyoona, wamebaki wale wachache wenye vibanda pembeni mwa soko na yule wa buchani tu,” alisema Ugando.
Ugando alisema kuwa miongoni mwa sababu za soko hilo kukosa ustawi wa kibiashara baada ya kukamilika ujenzi wake, ni kwamba waliokabidhiwa vizimba vya biashara hawakuwa wafanyabiashara.
Kwa mujibu wa Ugando, pia ugawaji wa vizimba hivyo, ulitoa kipaumbele kwa wananchi walioshiriki bega kwa bega ujenzi wa soko hilo. Hivyo licha ya wengi wao kuwa siyo wafanyabiashara, walichukua kwa lengo la kukodisha ili wapate pesa.
Ugando alisema kuwa ubovu wa barabara pia umechangia watu kulikimbia soko hilo, na hivyo kuendeelea kusalia kuwa gofu na mapango ya ndege.
Ugando amelieleza Tumaini Letu kuwa kitendo cha wafanyabiashara kukimbilia maeneo ya barabarani wakiamini kuwa ndiyo sehemu yenye mzunguko mzuri wa biashara kutokana na idadi kubwa ya watu, imedhoosha soko hilo.
Naye Emmanuel Pascal, mfanyabiashara wa nyama pembezoni mwa soko hilo, aliiomba Serikali kukarabati vyoo na huduma ya maji, ili kuweka sawa mazingira ya soko hilo.
LUSAKA, Zambia
Rais wa Baraza la Maaskofu Katoliki nchini Zambia, Zambia Conference of Catholic Bishops (ZCCB), Askofu Mkuu Mhashamu Ignatius Chama amewataka vijana waliohitimu Chuo Kikuu cha Kikatoliki Zambia, kuwa mabalozi wa uadilifu katika maisha binafsi na kitaaluma.
Askofu Mkuu Chama alisema hayo wakati wa mahafali ya 12 ya Chuo Kikuu cha Kikatoliki cha Zambia, na kueleza kwamba ubora wa kitaaluma, siyo tu kupata alama za juu, bali ni kukuza kiu ya maarifa, kukuza ujuzi wa kufikiri kwa kina, na kukuza shauku kubwa ya kujifunza.
LILONGWE, Malawi
Mwenyekiti wa Tume ya Kichungaji Baraza la Maaskofu Katoliki nchini Malawi, Mhashamu Martin Anwel Mtumbuka, amewataka Wakatoliki kuzingatia na kufuata Liturjia katika Madhimisho ya Misa Takatifu.
Mhashamu Mtumbuka ambaye pia ni Askofu wa Jimbo Katoliki Karonga, Lilongwe nchini humo, alisema kuwa hatua yake ya kuwasimamisha washiriki kwa muda kusoma nia ya maombi wakati wa Misa ya Jubilei ya Dhahabu kwa ajili ya Shirika la Wanawake Wakatoliki mjini, ililenga kuwafundisha waamini kuheshimu agizo la Misa.
Waandaji wa hafla hiyo walipanga safu ya maombi yanayohusu nyanja zote za maisha ikiwa ni pamoja na kuliombea Kanisa la Ulimwengu, Kanisa la mahali, viongozi wa kisiasa, watoto na vijana lakini kwa lugha mbalimbali za kienyeji kwa lengo la kuonyesha kwamba Kanisa linaunganisha Wamalawi wa tamaduni na lugha mbalimbali.
Baada ya maombi hayo kufanywa kwa lugha ya kwanza ‘ndogo’, badala yake waliitikia kwa utaratibu, baadhi ya waamini walipiga makofi na kufoka, jambo lililomkera Askofu Mtumbuka na kurekebisha hali hiyo mara moja.
“Ndugu hawa wanawake wanaomba Mungu, na siyo wewe. Acha kelele na kupiga makofi kwa maana bado tuko kwenye Misa. Waache watuombee kwa niaba yetu kwa utaratibu,” alishauri, na maombi yaliendelea kwa lugha nyingine.
“Kwa niaba ya Maaskofu wenzangu, nataka niwaelekeze kwamba kuanzia sasa na kuendelea, hatutaki kuona tena tulichokiona leo. Najua bado tuna kazi nyingi za kitaifa mbele yetu na tutakuwa waangalifu sana...;
“Tumechoshwa na hili, na mimi binafsi sitakaa na kutazama maingiliano yasiyo ya lazima wakati wa Misa. Tunapokuwa na watu wanaosali kwa lugha zao za kitamaduni wanamwomba Mungu, tuweke mazingira ya namna hiyo ambayo yanafaa kwa maombi kila wakati,” alisema Askofu Mtumbuka.
Kwa upande wao Chama cha Wanawake Wakatoliki nchini Malawi, kilisema kuwa mwongozo uliotolewa na Askofu Mwenyekiti wa Tume ya Kichungaji na kubahatika kumpata Rais wa zamani wa shirika hilo ambaye pia ni mjumbe wa bodi ya Umoja wa Wakatoliki Duniani, Lucy Jocelyne Vokhiwa, utasaidia kuwapa mwelekeo mzuri katika sala.
MWANZA
Na Paul Mabuga
Katika kupatana biashara baadhi ya Waswahili, kwa maana halisi ya kiarabu, watu kutoka Pwani, hasa wazaramo, wanaongozwa na dhana kuwa, kwa mwali kuliwe na kwa kungwi kuliwe.
Dhana hii huwaongoza katika mwelekeo wa kamba ili kufanikisha mapatano ya biashara ni lazima kukubali kupoteza kidogo kwa mdaawa [the party] ili upate zaidi.
Ukifika hapa unafikiria, ingekuwa Wazaramo kama wataongozwa dhana hii wangesema nini kuhusu mtazamo wao katika mjadala kuhusu kile kinachoendelea katika makubaliano ambayo yana lengo la kupata mwekezaji wa kuiendeleza Bandari ya Dar es Salaam.
Hasa kwa sababu kuna pande nyingi zinavutana huku kila mmoja ukijinasibu kuwa sahihi, lakini mwisho hatimaye wana mzizima katika utajiri wao wa lugha wanatuambia kama tunataka kufaidika katika hatua ya kuelekea uendelezwaji wa Bandari ya Dar es Salaam ni lazima kwa mwali kuliwe na hali kadhalika kwa kungwi!
Tunahitaji kuivuna vya kutosha bandari yetu ili kupata rasilimali kwa ajili ya maendeleo ya nchi.
Kama ilivyo kawaida, tuna watu, ardhi na rasilimali za asili lakini hatuna mtaji, teknolojia na utaalam ambao kwa changamoto inayotukabili ni lazima utoke kwa kungwi!
Wazaramo wanatuambia kwamba lazima tukubali kupoteza sehemu ikiwa tunataka kufanikiwa zaidi. Anayekuja kuwekeza anashida zake na sisi mwali wetu naye ana shida zake.
Ila kwa mijadala, misimamo na ushauri unaotolewa na makundi mbali mbali kwa watoa maamuzi, unatupa hadithi nyingine.
Hii ni hadithi ya familia iliyokuwa inataka kwenda kumuuza punda wa familia kwa ajili ya kupata fedha, kama rasilimali kwa ajili ya kutatua changamoto waliyokuwa nayo, pengine kama sisi ilivyo na bandari yetu.
Katika kufanikisha hilo familia ikamchagua Baba na Mtoto wa kiume mwenye umri wa miaka 15 kweda kumuuza punda huyo mnadani.
Kwa kuwa mnada ulikuwa mbali iliwabidi kusafiri kwa kutembea na punda wao huku njiani wakikutana na watu wa aina mbali mbali. Wao wakitembea na Punda pembeni yao.
Walipofika mahali fulani, mmoja wa watu aliokutana nao, akawaambia baba, mbona unamtembeza huyu mtoto, atachoka, maane yeye siyo mtu mzima na hawezi kuhimili mwendo mrefu.
Kwamba mwendo mrefu utamuathiri afya yake na hivyo ni akheri mtoto apande juu ya punda na safari iendelee ili kumuokoa na madhila yanayoweza kumpata.
Baba akachukua ushauri ule na mtoto akapanda juu ya punda huku yeye akitembea kwa miguu na wakaendelea na safari kuelekea mnadani.
Kama ilivuo katika siku za mnada watu huwa wengi na mifugo yao kuelekea katika mahali ambako kuna siku ya soko.
Wakiwa safarini, wakakutana na jamaa mwingine tena ambaye yeye aliwasimamisha na kuwaambia, kulikoni, kijana ambaye anatakiwa kujengwa kwa utu wema na nguvu ndiyo apande punda ilihali baba yake anatembea. Yule jamaa akasema huko siko kumfunza vema mtoto na ni kumkosesha adabu.
Wakausikia ushauri na mtoto akateremka na Baba akapanda punda na safari inakendelea. Wakiwa njiani wakakutana na mtu mwingine ambaye yeye aliwauliza kwamba, huyo punda wanakwenda kumuuza au wanamtumia kwa usafiri? Baba akajibu, Naam, tunakwenda kumuuza.
Ndipo mtu yule akawaambia, kama ni wa kuuza, inabidi wasimpande ili afike akiwa na afya na kupata bei nzuri! Na kwamba ingekuwa bora zaidi wangembeba punda wao hadi mnadani.
Baba na mtoto wakauchukua huo ushauri na kuendelea na safari huku wakiwa wamembeba mabegani punda yule na kuendelea na safari.Wakaendelea na safari huku punda akiwa mabegani.
Katika njia hiyo kulikuwa na changamoto ya mto na hivyo iliwalazima kuuvuka mto huo na punda wao mabegani ili kuendelea na safari kwenda mnadani.
Kwa bahati mbaya, kutokana na mto kuwa na maji yenye mwendo kasi, baba aliteleza na punda yule akaanguka na kusombwa na maji na wasiweze kumuokoa.
Na matokeo yake familia ile ikawa imemkosa punda wa kuuza na fedha walizotegemea kupata ili kutatua shida zao zikakosekana.
Familia ikaanza kulaumiania kutokana na kufuata ushauri ambao ni kama vile uliwapoteza njia. Walifikia hatua ya kuchunguza kila aliyekuwa akiwashauri alikuwa na wasifu gani, lakini haikusaidia, ikawa imeisha hiyo.
Katika jambo letu la Bandari kuna kila aina ya ushauri, kuna idadi ya makundi kadhaa yanayohusika na pia ni wazi kuwa karibu kila moja linaonekana likiwa na chanzo chake cha hamasa kufanya hivyo.
Bahati nzuri karibu moja kati ya makundi hayo na ushauri unaotolewa unalenga kumfikisha punda mnadani.
Pengine cha kujiuliza ni kuwa je, msimamo uliopo na ushauri unaotolewa utatusha mtoni na tukafika mnadani na kupata kile ambacho tumedhamiria kukipata na kunufaika kama taifa na wananchi.
Lakini pia ifahamike kuwa kwa eneo la kimkakati ambalo Bandari ya Dar es Salaam ipo, na kama ilivyo katika maeneo megine, kama reli ya kati, Bwawa la Mwalimu Nyerere na hata bomba la Mafuta ghafi kati ya Uganda na Tanzania, limekuwa na changamoto ya kushambuliwa kiushindani na hata watu wa nje na watanzania wanapaswa kujitambua katika hili.
Tunahitaji kuwa makini ili Bandari hii iwe aina ya rasilimali bora itakayotupatia manufaa watanzania kwa ujumla.
Katika safu hii ya Chimba Chimba Historia ya Kanisa wiki iliyopita tuliwaletea Kuibuka kwa Kanisa la Misioni Katika Karne ya 20 Sehemu ya Pili. Leo tunawaletea historia jinsi Papa Pio XI kama mwalimu na Mwanadiplomasia, alivyopambana na madikteta na Ukomunisti dhidi ya Kanisa. Sasa endelea…
Kipindi kati ya vita Kuu ya Kwanza na Vita Kuu ya Pili (1918-1939), kilijaa hali ya kutoelewana na serikali, kwa sababu hazikuwa na msimamo thabiti. Kwa upande mmoja, kulikuwa na wale waliopenda demokrasia isiyo na kipimo, ambayo ilipinga hata maadili ya dini kama kandamizi.
Kwa upande mwingine, kulikuwa na udikteta ambao mtu au kundi la watu walitaka kuunda serikali yenye madaraka yote, bila kuingiza mawazo au ushiriki wa wananchi.
Kazi ya kwanza aliyoifanya Papa Pio XI ni kuleta amani na uelewano kati ya serikali ya Italia, na kanisa. Mwaka 1929 aliweza, baada ya majadiliano marefu, kufikia muafaka na serikali ya Italia juu ya nafasi ya Papa kama mtawala huru wa nchi huru ya Vatikano.
Hii ilikuwa hatua kubwa sana. Alijitahidi kufikia makubaliano na nchi nyingine ambayo yalilinda haki na uhuru wa Kanisa.
Upinzani dhidi ya Udikteta:
Ingawa Papa Pio XI alifikia mapatano na nchi mbalimbali, hili halikumzuia kupinga majaribio ya kuwafanya watawala kuwa miungu, au kufanya serikali kuwa juu ya maadili ya Mungu.
Papa Pio XI anajulikana sana kwa kuweka nguvu zake nyingi katika kuunda “Actio Catolica,” yaani kwetu iliitwa “Aksio Katolika“. Kwa kuunda Aksio Katolika, alikuwa anasisitiza kwamba ni jukumu la walei kushiriki katika kazi ya hierakia ya uinjilishaji.
Hivyo, vyama vya Aksio Katolika, tofauti na vyama vingine vya sala na kujitakatifuza, vilipaswa kutoka nje na kuinjilisha, kuimarisha maadili ya jamii na kuleta uongozi bora wenye sura ya Kikristu katika kila nyanja.
Wana Aksio Katolika kama chama, hawakuingilia siasa ya vyama, ilibidi wawe juu ya vyama, lakini binafsi walihamasishwa kushiriki katika siasa na kuifanya iwe nzuri na takatifu.
Aksio Katolika ilitengeneza waamini walei wenye imani kubwa na nguvu za kutetea imani na Kanisa lao ulimwenguni kote. Kwa sababu hiyo, viongozi wa serikali waliovunja maadili, hawakuwapenda.
Vugu vugu hili lilienea hata mpaka Nchi za Misioni. Tanzania waliitwa “Aksio Katolika” au Waaksio nao walikuwa watu wenye uwezo, na hata mara nyingine walivaa kama Wamisionari na kuongoza Makanisa yaliyokuwa mbali na Wamisionari.
Wengine walitumwa katika sehemu ambazo Wamisionari walikuwa bado kufika, watayarishe watu kupokea imani. Katika siku zetu, vyama kama Wanataaluma Wakatoliki (Catholic Professionals of Tanzania: CPT) wanaoaswa kufanya kazi, ambayo ilikuwa inafanywa na wana Aksio Katolika.
Wakati huo, nchi nyingi zilianza kuingia udikiteta. Watawala madikteta kundi la kwanza ambalo walilipiga vita likikuwa lile la Aksio Katolika kwa sababu walikuwa na nguvu, na hawakuyumba katika imani yao. Walishtakiwa kupokea maagizo kutoka kwa Papa dhidi ya serikali.
Papa Pio XI aliandika barua 31 za kichungaji juu ya mambo mbalimbali. Kati ya hizo, barua tatu zilikuwa na uzito mkubwa kwa sababu aliongelea juu ya hali ya kisiasa, na hasa juu ya unyanyasaji wa wana Aksio Katolika na vyama vingine, hasa vile vya watoto na vijjana au‚ Vijana Wakatoliki.
Italia chini ya uongozi wa Musolini:
Wakati wa Vita Kuu ya Kwanza, Musolini akiwa na chama kidogo cha mafashisti, alisaidia Italia kuingia katika vita dhidi ya Ujerumani. Baada ya ushindi alilalamika kwamba katika makubalinao ya Versailles, Italia haikupewa ardhi ilizotaka.
Kwa namna hiyo, alitumia utaifa wa Waitaliani na ari waliyoipata wakati wakiwa katika harakati ya kuunganisha Italia, kusema kwamba kuna Waitaliani ambao bado ni mateka katika nchi nyingine, hivyo sehemu zote wanakoishi Waitaliani zinapashwa kuunganishwa na Italia.
Pole pole alitumia malalamiko ya watu juu ya hali mbaya ya uchumi, na hivyo kuunda kikosi cha wanamgambo wafashisti. Mwaka 1922 kikundi hiki kiliingia na kuvamia Roma na kuipindua serikali, na Musolini akawa Waziri Mkuu.
Akiwa madarakani, alitumia kigezo cha utaifa kuvamia nchi kama Ethiopia, ili nao wawe na koloni. Vile vile, alivamia Albania akisema ni sehemu ya Italia. Alipenda kuvamia na kuchukua sehemu nyingine zilizokuwa kando ya Italia.
Ufashisti ni nini?
Ufashisti ni aina ya serikali iliyojumuisha mfumo wa kimabavu na serikali ya uzalendo kitaifa pamoja na kushirikisha jamii kwa kuwarubuni kiakili kwa mikutano mikubwa na kampeni.
Ni serikali ambayo dikteta au mfalme anaidhibiti serikali, watu wanaotawaliwa inabidi kufuata maagizo ya dikteta wao, la sivyo, wataadhibiwa. Pole pole alichukua madaraka yote.
Mwanzoni alitaka kuwa na amani na Kanisa Katoliki, akijua kwamba lina nguvu. Hii ndiyo sababu aliweza kufikia Makubaliano ya Laterano yaliyounda Nchi ya Vatikano. Lakin siku zilivyoendelea, alianza kupiga vita mafundisho ya Dini yaliyoendana tofauti na mawazo yake.
Alipiga marufuku vyama vya Walei Wakristo. Mfalme Emmanuel III wa Italia alibaki kuwepo bila madaraka. Musolini alijiita “Il Duce” maanake “Kiongozi Mkuu.”
Kwa kupinga hayo yote, Papa Pio XI tarehe 21 Juni 1931, aliandika barua kwa lugha ya Kiitaliano, tofauti na barua nyingine ambazo zilikuwa katika Kilatini, ikiitwa, “Non Abbiami Bisogno“ ikimaanisha “Hatuwahitaji.”
Barua hii ilikuwa inampinga Musolini ambaye alikuwa amefanya serikali itukuzwe sana. Musolini alikuwa ameunda serikali ya kifashisti ambayo ilikuwa serikali ya kidikteta, ambayo ilitaka kutawala kila sehemu.
Musolini alikuwa amepiga marufuku chama cha “Aksio Katolika“ na vikundi na vyama vyote vya watoto na vijana. Musolini alitaka awe na ukiritimba wa elimu ya watoto na vijana na pasiwepo na chama chenye kuhamasisha watu.
Papa Pio XI alikiona chama cha Musolini kama “ibada ya kipagani ya Serikali” (kuabudu Serikali) na “mapinduzi ambayo huwanyakua vijana kutoka kwa Kanisa na kutoka kwa Yesu Kristo, na ambayo hukazia kuingiza ndani ya vijana hao moyo wa chuki, jeuri na ukosefu wa heshima.”
Papa Pio XI alimwita Musolini mpinga Dini, na kwamba sera yake haiendani na mafundisho ya Kanisa. Mwanzoni itikadi ya Musolini haikuwa mbaya sana, lakini tangu Mei 1938 Hitler alipotembelea Roma na pamoja wakaunda umoja wa ushrikiano (Axis), mambo yalibadilika. Musolini akaanza kuiga sera za Hitler za Ujerumani, mfano mmojawapo ni ule wa kuwakandamiza, hata kuwaua Wayahudi.
Viongozi wa Halmashauri ya Walei na baadhi ya Waamini wa Parokia ya Kung’ara kwa Yesu Kristo, Mbezi Mshikamano, Jimbo Kuu Katoliki la Dar es Salaam, wakiwa katika Adhimisho la Misa Takatifu ya Kutabaruku kanisa na Altare, iliyokwenda sanjari na kutoa Sakramenti Takatifu ya Kipaimara parokiani hapo.
Radio –Television Tumaini, also trading as Tumaini Media, consisting of Radio Tumaini, a weekly newspaper “Tumaini Letu” and a Television Station “Tumaini Television” is owned and run by the Archdiocese of Dar es Salaam, Tanzania since 1994.
+(255) 238-4131
info@tumainimedia.co.tz/p>
