Na Dkt. Nkwabi Sabasaba
ILIPOISHIA
MAISHA YA KAZI YA NDANI:
Hii ni nguvu yako ya ndani kama vile hamasa; hisia; imani; na unajisikiaje furaha yako. Maisha ya kazi ya ndani yanaweza kukufanya uifanye kazi kwa kiwango cha juu au cha chini, iwapo unafanya kazi ungali umevunjika moyo.
Nguvu ya kusonga mbele huchochewa na maisha ya kazi ya ndani kwa mujibu wa Dr. James Watts. Maisha ya kazi ya ndani yanaweza kuchochea kanuni ya maendeleo ifanye kazi pia.
Endelea...
Mabadiliko madogo madogo yanaweza kuchochea maisha ya kazi ya ndani. Mfano, mtaji wa sh. 5,000 au elfu kumi, utahusisha bidhaa ndogo ndogo ambazo kila mtu ana uwezo wa kuvinunua, na kwa kadri watu wanaponunua wengi kwa wakati mmoja, ndipo hamasa yako ya kuendelea kufanya biashara hiyo, inavyokua. Unapoona watu wengi wananunua bidhaa yako kwa wingi, japo ni ndogo, maisha ya kazi ya ndani yanaoongezeka. Unajiona umefanya jambo.
Mnamo mwaka 1983, Steve Jobs alikuwa akijaribu kumshawishi John Sculley aache kazi ya muhimu sana kwenye kampuni ya Pepsico ili awe Mkurugenzi Mkuu wa Apple. Jobs anaripotiwa kumwambia, “Je, unapenda kuyatumia maisha yako yote yaliyobaki kuuza maji yaliyotiwa sukari, ama unataka nafasi ya kuubadili ulimwengu?”. Kauli hii ya Jobs inataka kutuambia kwamba kuna kazi zenye maana. Kazi yenye maana ni ile ambayo italeta mabadiliko kwa watu, na itatutia moyo kuona inavyoleta mabadiliko.
AINA SABA ZA IMANI-MAZOEA ZISIZO NA FAIDA, NA JINSI YA KUZITOA:
Mambo yanayotuzuia kusonga mbele ni imani zetu binafsi. Imani hizi zimezaliwa kutokana na sababu kwamba jambo hili tuna uzoefu nalo, au tumekuwa tukiambiwa, au kufundishwa. Watu waliofanikiwa ni wale walioamuru kukana imani hizo na kufanya kilicho mbele yao.
Mfano:
- Kwa kuwa kitabu pekee ambacho hakina makwazo ni quran au biblia, maana yake ni kwamba kusoma vitabu vingine, nitakwazika.
- Kuchagua tovuti (website) na kuzitembelea, zingine huna mapenzi nazo.
- Kuamini kuwa watu wafupi ni wabishi, kwa hiyo hupendi ushirika nao, n.k.
Ebu sasa tutazame aina za imani mazoea, ambazo hazina faida, na namna ya kuondokana nazo:
1. KUTEGEMEA KITU KUTOKA KWA WENGINE, AU KUTOKA MAISHANI:
Haimaanishi kwamba uache kushirikiana na wengine ili kupata mchango wao. Ukweli, wewe ndiyo kichocheo kikuu cha mabadiliko ya ulimwengu wako. Ijulikane kwamba mchango wa msaada wa watu kwako, ni kwa sababu ya juhudi zako. Watu hujitokeza zaidi kukusaidia kama umewakaribisha wakusaidie, au iwapo wameona juhudi zako. Pia, kitendo cha kuwakaribisha wakusaidie, hiyo ni juhudi yako. Juhudi yoyote huzaa matunda. Msemo ‘mtaji wa maskini ni nguvu zake mwenyewe’ , una maana kwamba wewe ndiye mtaji. Mtaji hauko pale wala huko, ila ni wewe mwenyewe. Jipe moyo mwenyewe, moyo ukiwa na hamasa, utafanikiwa.
Franklin D. Roosevelt alisema, ”Kipingamizi pekee cha mafanikio yetu ya kesho, ni ile hofu tuliyo nayo leo.”
Kila mtu kabla hajaanza kutenda, mafanikio yake ni 100%. Anapoanza kutenda, mafanikio yanaanza kupungua hadi 90% na kushuka chini, lakini hutegemea kila hatua ya utendaji wako unaambatanisha hofu kiasi gani.
2. KUTEGEMEA KUWAZA TU, NA KUPUUZA SAUTI YA NDANI:
Watu wengi hawatilii maanani hisia na sauti za ndani au kutoziamini. Kuna aina mbili za kuwaza. Kuwaza kwa akili ya ufahamu. Hii huwaza taratibu sana na inatumia nguvu nyingi. Na kuwaza kwa kutumia akili ya kina, hii huwaza kwa haraka sana. Akili ya fahamu hukuletea majibu yaliyofikiriwa kwa makini kisha, kuamriwa. Majibu hayo yapo katika mpangilio mahsusi, wakati akili ya kina hutumia imani, na majibu yake ni ya haraka.
Mfano, kuna familia moja ilikuwa inauza nyumba. Jirani yao akasema ataleta mteja. Siku moja kweli jirani akaleta mteja, familia ikakubaliana na mteja kuwa nyumba iuzwe kwa shilingi milioni 70.
Itaendelea wiki ijayo.
Na Arone Mpanduka
Hivi karibuni tumeshuhudia Shirikisho la Mpira wa Miguu nchini (TFF) likimtimua kocha wa timu ya taifa (Taifa Stars), Kim Poulsen, baada ya kutoridhishwa na mwenendo wake ikiwemo Taifa Stars kupoteza kwenye mchezo wa nyumbani wa kuwania tiketi ya kufuzu fainali za Afrika kwa wachezaji wa ndani.
Wapo watu walioshangaa, na wapo walioona kuwa maamuzi yaliyofanywa ni sahihi kwa sababu kocha haajiriwi ili afukuzwe hasa kama ikitokea kushindwa jukumu alilopewa.
Kwa miaka mingi sasa tumekuwa tukiajiri makocha kwa timu ya taifa na kisha kuwatimua, huku tukiwashushia lawama nzito kwamba wao ndiyo sababu kuu ya timu zetu kushindwa. Mwaka 2006 Rais Jakaya Kikwete kwa wakati ule, alituonyesha njia kwa kumleta kocha wa kigeni Marcio Maximo kutoka nchini Brazil, na hapo ndipo tukawa tunaamini moja kwa moja kwamba suluhisho kuu la timu zetu za taifa kufanya vizuri ni kuajiri makocha wa kigeni.
Ninadhani kuna mahali tunakwama, na pengine hatufahamu suluhisho lake, na hata kama tunalifahamu, tunaamua kujifanya hatufahamu. Unapofanya jambo ambalo hujui, unakwenda wapi na ukaendelee kulilazimisha, itakuwa sawa na kufukuza kuku gizani, ukidhani utamkamata.
Ukweli ni kwamba mafanikio ya timu zetu za taifa yamekuwa yanapatikana kwa kubahatisha, na si katika mifumo sahihi. Bado tunaogopa kuanza na sifuri ili twende mbele, na badala yake tunataka kulazimisha, tukiamini kwamba tutafika tunapopataka.
Kuna vitu havipo sawa, na inabidi turekebishe ili soka letu lifike tunapopataka.Na vitu hivyo vinaanzia katika ngazi ya familia, Serikali na vyombo vinavyohusika na mchezo wa soka.
Tatizo kubwa tulilonalo ni kutokuwa na mfumo bora wa kufikia mafanikio ya mpira wa miguu, vinginevyo tutaishia kuilaumu TFF na makocha wanaokuja kufundisha timu zetu.
Tukianzia ngazi ya familia, wachezaji wote waliopo wana wazazi au walezi wao. Je, nini mchango wao katika malezi ya kimwili na kisaikolojia kwa watoto wao? Kwa sababu leo hii tunaweza kuwa na wachezaji wazuri wazawa lakini hawana nidhamu.
Kitu ambacho ni muhimu kwa maisha ya mchezaji kinachoweza kumpeleka nje ya nchi kucheza soka la kulipwa, na hatimaye kuongeza ubora kwenye timu za taifa, ni ufundi au umahiri wa kucheza soka.
Jambo lingine katika familia ni suala la lishe bora. Je, umewahi kujiuliza ni kwa nini wachezaji wa kizazi hiki wana maumbo madogo madogo, ikilinganisha na wale wa miaka 30 iliyopita? Wazazi katika hilo wanahusikaje?
Ukija katika ngazi ya klabu, je, vilabu vyetu vinaendeshwa kwa weledi, kwa maana ya kuandaa timu zetu za wakubwa? Kuna uwekezaji wa kiwango gani katika miundo mbinu ya soka?
Kwa sababu ukichunguza kwa makini utabaini, kwamba klabu chache za Ligi Kuu zina mifumo mizuri ya kutengeneza vijana, lakini zingine hazina, na hata yakitokea mashindano ya vijana, wanachofanya ni kuokota vijana wa mitaani ili kuiridhisha TFF.
Tukija kwa Serikali, je, kuna viwanja vingapi vya wazi ambavyo vilikuwa vinatumika kwa michezo zamani, lakini sasa hivi vimegeuzwa kuwa ofisi za watu binafsi, gereji, shule ama baa? Na katika hilo hilo la viwanja, ni shule ngapi za umma za Msingi na Sekondari zina viwanja vye michezo? Watoto watacheza wapi? Vipaji tutaviibua wapi? Na hapo ndipo msingi wa soka wa nchi yoyote unapoanzia.
Je, kuna waalimu wangapi wa michezo waliofuzu kwenye eneo hilo katika shule zetu za umma za msingi na sekondari, na je, kuna shule ngapi zenye vipindi na ratiba za michezo kama ilivyokuwa zaidi ya miaka 40 iliyopita?
Majibu ya jumla ni kwamba kwa sasa hakuna maeneo mengi ya wazi, na hata shule nyingi za umma ninazoziona mitaani hazina viwanja vya kuchezea. Mfano mzuri ni Shule ya Msingi Tabata Liwiti, ambayo ipo jirani kabisa na ofisi za Tumaini Media ambayo uwanja wake wa soka linajengwa jengo la Shule ya Sekondari. Pongezi kwa kuweka jengo hilo, lakini watoto watachezea wapi?
Hapo Wizara husika na Baraza la Michezo la Taifa (BMT) wanapaswa kutengeneza na kusimamia mfumo ulio bora ambao ndio utakuwa muongozo wa nchi. Nilisikia sera ya michezo inakamilishwa, lakini bado sifahamu ilipofikia.
Itaendelea wiki ijayo.
Baba Mtakatifu Fransisko (kushoto) akisalimiana na Baba Mtakatifu Mstaafu Benedikto XVI wakati Papa alipomtembelea Mstaafu huyo katika makazi yake, akiambatana na Makardinali wapya.
Vatican City
Makardinali Wapya wamemtembelea na kumsalimia Baba Mtakatifu Mstaafu Benedikto XVI, katika makazi yake.
Makardinali hao 20 walifanya ziara hiyo ya Kitume, baada ya Ibada ya kutangazwa na kusimikwa, ambapo walikwenda kumsalimia na kumtakia heri Baba Mtakatifu Mstaafu Benedikto XVI.
Mababa Watakatifu hao wawili kwa pamoja baada ya kusalimiana na kuteta na Makardinali hao wapya, waliwabariki ili wakawashe moto wa huruma na upendo wa Mungu kwa waja wake.
Baba Mtakatifu Fransisko aliwatangaza na kuwasimika Makardinali wapya na kuwapigia kura Wenyeheri wapya wanaotarajiwa kuingizwa kwenye orodha ya Watakatifu wa Kanisa.
Wenyeheri hao ni Mwenyeheri Padri Giovanni Battista Scalabrini aliyetangazwa na Mtakatifu Yohane Paulo II, kuwa Mwenyeheri, Novemba 9, mwaka 1997.
Padre Giovanni Battista alizaliwa Julai 8, mwaka 1839 na kufariki dunia Juni Mosi mwaka 1905.
Alikuwa ni Askofu wa Jimbo Katoliki la Piacenza-Bobbio, Italia na Mwanzilishi wa Mashirika ya Wamisionari wa Mtakatifu Carlo Borromeo, maarufu kama Wascalabrini, na pia ni Muasisi wa Taasisi ya Waamini Walei Wascalabrini, iliyoanzishwa kunako mwaka 1961.
Wa pili ni Mwenyeheri Artemide Zatti, Bruda wa Shirika la Wasalesian wa Don Bosco, aliyezaliwa tarehe 12 Oktoba 1880, nchini Italia.
Akafariki dunia Machi 15, mwaka 1951 huko Viedma nchini Argentina.
Utakatifu wake unapata chimbuko lake katika huduma kwa maskini kwa kuongoza hospitali na duka la dawa kwa ajili ya maskini, kwa muda wa miaka 40.
Aprili 14 mwaka 2002, alitangzwa na Baba Mtakatifu Yohane Paulo II, sasa ni Mtakatifu, kuwa ni Mwenyeheri.
Separated they live in Bookmarksgrove right at the coast of the Semantics, a large language ocean. A small river named Duden flows by their place and supplies it with the necessary regelialia. It is a paradisematic country, in which roasted parts of sentences fly into your mouth.
DAR ES SALAAM
Na John Kimweri
Askofu Mkuu wa Jimbo Kuu Katoliki la Dar es Salaam, Mhashamu Jude Thaddeus Ruwa’ichi, amewataka waamini kutoa kipaumbele na kuwakumbuka wanyonge na watu wasiojiweza katika karamu mbalimbali wanazoziandaa.
Wito huo aliutoa hivi karibuni wakati akitoa homilia yake katika Adhimisho la Misa ya kutoa Sakramenti Takatifu ya Kipaimara, iliyokwenda sanjari na uchangiaji wa ujenzi wa nyumba ya Mapadri, iliyofanyika katika Parokia ya Mtakatifu Dominiko Savio, Mikoroshini Tandika, jimboni humo.
Alisema Wakristo hawawezi kumlipa Kristo kwa kazi kubwa ya ukombozi aliyoifanya, lakini kwa njia ya kuwasaidia wengine, wanaweza kufanya utume na kazi ya kumpendeza Mungu.
“Yesu anatuambia kwamba tunapofanya karamu, tuwakumbuke wanyonge kama maskini, viwete, na wale wasio na cha kutulipa, wale ambao hutegemei nao waandae sherehe wakualike,” alisema Askofu Ruwa’ichi.
Askofu Ruwa’ichi alieleza kuwa katika Pentekoste, Roho Mtakatifu aliwashukia mitume na kuwapa nguvu, uthubutu na msukumo wa kwenda kuitangaza Injili, bila kuogopa.
Alisema kijana anayeimarishwa akimpokea Roho Mtakatifu, anakamilishwa katika neema ya ubatizo, kwa kuwa katika ubatizo huzaliwa mara ya pili, na kufanywa kuwa mtoto wa Mungu na ndugu wa Kristo.
“Katika Pentekoste, Roho Mtakatifu aliwashukia Mitume na kuwapa nguvu na uthubutu na msukumo wa kwenda kuitangaza Injili. Hawa watoto leo kwao ni Pentekoste, na watampokea tena Roho Mtakatifu, kwasababu tayari walishampokea” alisema Askofu Ruwa’ichi.
Katika hatua nyingine, Padri Canisius Hali, wa Parokia hiyo amewaalika waamini na watu wote wenye mapenzi mema kushirikiana nao katika kazi hiyo ya ujenzi wa nyumba ya mapadri.
Kwa mujibu wa Padri Hali, alibainisha kuwa kwa sasa ujenzi huo upo katika hatua za mwisho, na kumshukuru Baba Askofu kwa ushauri na kuwa pamoja nao katika shughuli hiyo.
“Tunajenga nyumba ya mapadri ambayo ipo katika hatua za mwisho, na Baba Askofu amekuwa karibu nasi katika hatu zote, ninawaalika waamini kutoka maeneo mbalimbali ili kushirikiana nasi katika kazi hii” alisema Padri Hali.
Katibu wa Halmashauri ya Walei Parokia hiyo, Pankrasia Heri, alifafanua kuwa kwa sasa Paroko wa Parokia hiyo anaishi nje ya nyumba hiyo, na hivyo kumshukuru mmoja wa waamini ambaye ndiye aliyejitolea nyumba hiyo.
Alisema pia kuwa kukosekana kwa nyumba hiyo, na wasaidizi wengine ndani ya Parokia kama Mafrateri na mashemasi, kumesababisha utendaji kazi wa Paroko uwe mgumu.
Ujenzi wa Kituo cha Afya cha kisasa katika Kata ya Lukobe, Mkoani Morogoro ukiendelea.
MOROGORO
Na Angela Kibwana
Serikari ya Tanzania imetoa Shilingi milioni 500/- zilizotokana na tozo za miamala ya simu, kukamilisha mradi mkubwa wa ujenzi wa Kituo cha Afya cha kisasa katika Kata ya Lukobe, Mkoani Morogoro.
Kukamliki kwa mradi huo kutawanufaisha zaidi ya wananchi 35,000 watakaopata shida za kiafya kutoka Kata ya Lukobe na Kata jirani, Mkoani humo.
Akizungumza wakati wa kukagua mradi huo, Mkurugenzi wa Manispaa ya Morogoro, Ally Machela alisema kuwa tayari Serikali imetoa shilingi milioni 500/= zilizopokelewa na Manispaa ya Morogoro kukamilisha ujenzi wa kituo hicho.
“Halmashauri ya Manispaa ya Morogoro inatekeleza mradi mkubwa wa ujenzi wa Kituo cha Afya katika Kata ya Lukobe kitakachohudumia wananchi 35,000 baada ya kukamilika kwake,”alisema Machela.
Alifafanua kuwa fedha zilizotolewa katika awamu ya kwanza ambazo ni kiasi cha Shilingi milioni 250/=, zilitumika kujenga maabara,jengo la wagonjwa wa nje, na kibanda cha kuchomea taka.
Aidha, alifahamisha kuwa katika awamu ya pili, Serikali ilitoa Shilingi milioni 250/- kwa ajili ya majengo mawili ambayo ni jengo la wazazi, jengo la kufulia nguo, na jengo la upasuaji.
Kwa upande wake Mganga Mkuu wa Manispaa ya Morogoro Dk. Charles Mkombachepa, alisema kuwa kituo hicho cha afya kitaongeza tija kwa wananchi kwa sababu kina uwezo wa kuhudumia watu 35,000 kutoka Kata ya Lukobe, Mkundi, Kihonda na Kata nyingine jirani.
Aliongeza kuwa kituo hicho kina majengo mbalimbali ya kutolea huduma kwa wagonjwa, kati yao kuna jengo la wanawake; jengo la wagonjwa wa nje; jengo la wazazi; jengo maalum kwa ajili ya upasuaji wajawazito; na huduma nyingine za afya ya mwanamke.
Mbunge wa Jimbo la Morogoro Mjini, Abdulaziz Abood, baada ya kuridhishwa na ujenzi wa kituo hicho, aliahidi kutoa magari mawili yenye thamani ya Shilingi milioni 172/- kubebea wagonjwa katika Kituo cha Afya Lukobe, na Kituo cha Afya Tungi kinachojengwa kwa mapato ya ndani ya Manispaa.
Nao baadhi ya wakazi wa Kata ya Lukobe walisema kuwa wanamshukuru Rais wa Jamhuri ya Muungano wa Tanzania, Samia Suluhu Hassan kwa kutenga fedha ili kukamilisha ujenzi huo.
Naye Mwandishi Victor Wambura anaripoti kuwa, wasomi nchini wameiomba Serikali kutimiza ahadi yake kwa wananchi kwa kuzielekeza tozo ili kuboresha miradi ya maendeleo ya jamii, hivyo kuondoa malalamiko ya wananchi kuhusu tozo hizo.
Akizungumza na gazeti la Tumaini Letu, Mchumi na Mhadhiri wa Chuo Kikuu cha Dar salaam (UDSM) Dk. Martin Chegere, alisema kuwa hakuna tozo yoyote itakayomfurahisha mtu, na hakuna mtu anaependa kitu kinachomchukulia pesa yake, ikiwa hakipo kwenye matumizi yake.
“Tumeahidiwa kwamba vikichukuliwa basi vitarudi kwa mfumo utakaotusaidia kuweka mazingira mazuri ya afya, elimu na miundombinu, hizo ndizo ahadi tulizoahidiwa na viongozi wetu,” alisema Dk. Chegere.
Alisema pia kuwa Serikali inatakiwa kuwatendea watu haki, kulingana na ahadi ya kuboresha miundombinu ya kijamii, kwa sababu wananchi wanaumia wakiona vitu hivyo havitendeki, hasa kwa kutumia kodi hiyo ya tozo.
Aidha, Dk. Chegere alisema kwamba usahihi wa tozo utakuwepo pale ambapo Serikali itarejesha kwa wananchi kwa namna bora zaidi ya kuwapatia huduma.
Aliwasihi wananchi kuiunga mkono Serikali, kwani hata kwenye Bibilia Takatifu, Yesu aliwaambia wanafunzi wake kuwa ya Kaisari mpe Kaisari na ya Mungu mpe Mungu, ikiwa na maana ya kwamba serikali nayo inahitaji mapato.
Naye Mchumi na Muhadhiri wa Chuo Kikuu Cha Dar esalaam Dk. Innocent Pantaleo, alisema kuwa Wananchi wanatakiwa kuiunga mkono Serikali kwa kukusanya mapato, na kudai kwamba kwa sasa wahisani hawaleti pesa za kutosha kama ilivyokuwa awali.
Aidha, Dk. Pantaleo aliiomba Serikali kuzingatia usawa kwa kumwangalia mwananchi mwenye kipato cha chini, ili kuondoa matabaka.
Hata hivyo, alisema Serikali izingatie kuboresha maeneo ambayo yanamgusa huyo mwananchi anaetozwa kodi kwa kuboresha miundombinu ya kijamii, kama vile ya afya, elimu na miundombinu, kwani hicho ndicho kilio cha wengi.
Nairobi, Kenya
Mwendesha baiskeli wa Kenya Suleiman Kangangi amefariki dunia kufuatia ajali ya mwendo kasi katika mbio za magari nchini Marekani siku ya Jumamosi.
Mchezaji huyo mwenye umri wa miaka 33 ambaye alikuwa akishiriki mbio za changarawe za Overland huko Vermont, shindano la kilomita 59 la barabara za udongo, likijumuisha takriban futi 7,000 za kupanda.
Kangangi alimaliza wa tatu katika Tour of Rwanda mwaka wa 2017 alipokuwa akikimbilia timu ya UCI Continental ya Ujerumani, Bike Aid, kabla ya kubadili mbio za changarawe.
Kwa upande wake Rachel Ruto, mke wa rais mteule William Ruto wa Kenya, alichapisha kwenye Twitter, “Sote tutamkosa kama mtu binafsi. Kenya imepoteza bingwa. Pumzika kwa amani Sule”.
Nayo taarifa ya klabu yake ilisema, “Sule ni nahodha wetu, rafiki, kaka. Yeye pia ni baba, mume na mwana”.
Kamati ya Uongozi wa Kitaifa ya Kushughulikia Mambo ya Kitume iliyoteuliwa na Baraza la Maaskofu Katoliki nchini Ethiopia, ikiwa katika picha ya pamoja.
ADDIS ABABA, Ethiopia
Baraza la Maskofu Katoliki nchini Ethiopia limeunda Kamati ya uongozi Kitaifa, ili kushughulikia changamoto mbalimbali za Kitume.
Maaskofu hao wamepitia masuala msingi ya Kitume ya Kanisa, fursa na changamoto katika mkutano wao wa kawaida wa 53, na kuunda Kamati ya Uongozi ya Kitaifa itakayofanyia kazi maandalizi ya Mpango Mkakati wa Miaka 10, ili changamoto zilizojitokeza wakati wa mkutano huo, ziweze kutatuliwa ipasavyo.
Kamati ya uongozi ya Taifa itaongozwa na Katibu Mkuu Mchungaji Abba Teshome Fikre, na itakuwa na wajumbe 10 wakiwemo Naibu Katibu Mkuu, maafisa na wakuu wa CMRS, na Mshauri wa ndani.
Kamati ya kitaifa tayari imeanza kazi yake ya kujadili Mchakato wa Mpango Mkakati, kuandaa mikakati ya utekelezaji na jukwaa la awali la uhamasishaji. Kwa kuzingatia hili katika wiki chache zilizopita, kamati imeandaa Mpango Kazi wa Miezi Sita ijayo.
Kuanzia Agosti 10 hadi 13, awamu ya kwanza ya kazi imekuwa ziara katika Majimbo mbalimbali, na maandalizi ya mpango wa kina yamefanyika katika Majimbo sita, ambayo ni pamoja na Jimbo Kuu Katoliki la Addis Ababa, Vikariati ya Meki, Jimbo Katoliki la Kitume la Vazi, Vikariati za Hawasa, Sodo, Hossana, Jimma-Bonga, na Eparchy ya Emdibir.
Katika mchakato huo, majadiliano mbalimbali yalifanywa na Maaskofu na viongozi husika kuhusu Mpango Mkakati huo.
Baadhi ya ajenda zilizoonyeshwa katika mjadala ni pamoja na Asili ya Mpango Mkakati wa kina wa Kanisa; Umuhimu wa Mpango Mkakati wa Miaka 10; Mchakato na Changamoto za Sasa za Huduma ya Dayosisi; Wajumbe wa Kamati ya uongozi ya dayosisi wakishirikiana na kamati ya Taifa.
Kwa kuongezea, mafunzo mafupi kuhusu itifaki za mawasiliano na jukwaa pepe, yalitolewa ili mawasiliano ya kazi zijazo yawe na ufanisi.
Majadiliano mengine yatafanyika katika maeneo ya Eparchy ya Bahirdar-Dessie, Vicariate ya Nekemet, na Dayosisi ya Gambella, na wawakilishi wa makuhani wa Eparchy of Adigrat watafanya mkutano huko Addis Ababa.
Mpango Mkakati wa Kanisa nzima ni mojawapo ya maelekezo ya kazi yanayofuata yaliyoamuliwa na Baraza la Maaskofu, Mpango Mkakati wa Miaka 10 wa Kanisa utatayarishwa kwa kuzingatia maono ya pamoja ya Kanisa, kwa kuzingatia huduma ya kichungaji, maendeleo ya kijamii. na maelekezo ya kiutawala ya Kanisa.
Mpango wa miaka 10, unatathmini mipango ya awali iliyofanywa na taasisi za Kanisa, pamoja na ile ambayo imeanzishwa na inayotekelezwa. Muda mfupi wa mipango mkakati, changamoto katika utekelezaji na ukosefu wa tathmini kwa wakati, ulielezwa kuwa sababu kuu za kutotekelezwa.
Kamati ya Uongozi iligawa Mpango Mkakati katika awamu nne za utekelezaji, na kuweka ukomo wa muda kwa kila moja. Hatimaye, Mpango Mkakati unalenga Mashirika ya Kanisa kufanya kazi pamoja kwa ajili ya maono ya pamoja ambayo yanasimamia utume na maadili ya Kanisa Katoliki.
GULU, Uganda
Maandalizi ya kutangazwa Padri Joseph Ambrozoli kuwa Mwenyeheri yanaendelea vizuri, tukio litakalofanyika wakati wa Adhimisho la Misa Takatifu itakayofanyika Jimbo Kuu Katoliki la Gulu, Uganda Novemba 20, mwaka huu.
Mchungaji John Baptist Odama wa Jimbo Kuu Katoliki la Gulu alisema kuwa Kamati Kuu ya Maandalizi (COC) yenye kamati ndogo 16 imeundwa, na wote wanafanya kazi ya kuona jinsi ya kuwapokea watu watakaokuja kuhudhuria ibada hiyo.
DAR ES SALAAM
Na Nicolaus Kilowoko
Kocha Msaidizi wa timu ya Taifa ya Tanzania, Taifa Stars Mecky Mexime amefunguka kuwa kwa sasa Watanzania wanapaswa kuganga yajayo, hasa katika kuwekeza nguvu na mapenzi juu ya timu yao ya Taifa.
Mexime ameyasema hayo mara baada ya Watanzania wengi kusikitishwa na matokeo ya Taifa kushindwa kufurukuta katika mashindano mbalimbali wanayoshiriki, na kusababisha wengi kuumia.
Mexime alisema kuwa kwenye mpira hakuna kukata tamaa, na matokeo siku zote ni ya pande tatu, hivyo kwa sasa si vyema kulaumu sana, ila ni kuongeza nguvu kwa pamoja kama Watanzania.
Alisema kuwa timu ya Taifa ni ya Watanzania wote, na si ya mtu mmoja. Hivyo, kila jambo linawezekana ikiwa mataifa mengine yanafanikiwa kushiriki mashindano makubwa, hata Tanzania inaweza kushiriki katika mashindano hayo.
“Siku zote kuteleza siyo kuanguka, na hata kama ukianguka, unapaswa kusimama tena. Watanzania wazidi kupenda vya kwao na kuongeza nguvu kwa pamoja katika kuijenga timu yetu, na siyo kulaumu mtu”, alisema Mexime.
Alisema kuwa mchezo wa mpira kwa sasa ni vyema wote kwa pamoja tukatengeneza mkakati wa pamoja ili tuweze kufanya vyema katika michuano inayofuata na inayoshiriki timu hiyo.
Stars ilishindwa kufurukuta katika uwanja wa Benjamin Mkapa wakati wa mchezo wa kuwania kufuzu michuano ya wachezaji wanocheza ligi za ndani, CHAN, mbele ya timu ya Taifa ya Uganda kwa kufungwa bao 1-0.
Huu ni mwendelezo wa matokeo mabovu ambayo Stars wameendelea kuyapata baada ya misimu iliyopita kushindwa kufuzu kucheza Kombe la Dunia, Afcon, Chan pamoja na michezo mbalimbali ya kirafiki.
Meck Maxime anachukua nafasi ya kocha msaidizi mara baada ya kuvunjwa kwa benchi la ufundi la Stars kutokana na matokeo mabovu. Hivyo anaungana kwa sasa na kocha Mkuu, Hanour Janza, akisaidiwa na kocha wa magolikipa, Juma Kaseja.
TFF ilitangaza kukubaliana na aliyekuwa kocha wa timu hiyo Kim Poulsen kumbadirishia majukumu, na sasa atabaki katika timu za vijana za Taifa.
Ikumbukwe kuwa Kim alitangazwa na TFF kuwa Kocha Mkuu wa Stars, Februari 15 mwaka 202, kabla yake aliwahi kuwa kocha wa Stars mwaka 2012 na 2013.
Kim mpaka anawekwa pembeni, amepoteza mechi 7, akipata ushindi kwenye mechi 6, na sare kwenye mechi 4. Alipewa mkataba wa miaka mitatu kuinoa timu ya Stars.
ARUSHA
Na Mwandishi wetu
Mkurugenzi wa Idara ya Ulinzi na Usalama wa Mtoto, Jimbo Kuu Katoliki la Arusha, Padri Dennis Ombeni amewataka Raia wa Jumuiya ya Afrika Mashariki popote walipo, kuwa mstari wa mbele kulinda uhai wa mtoto angali bado tumboni.
Mambo yanayojumuisha katika kumlinda na kumtetea mtoto, yakiwemo ya ukuaji, kumlinda katika nyanja zote kiuchumi, kiafya na kiakili, na ustawi wa Mtoto.
Padri Ombeni aliyasema hayo katika warsha kwa Vijana na wazazi iliyofanyika jijini Arusha iliyolenga kuwajengea uelewa kuhusu athari zilizopo kwenye muswada wa ujinsi na afya ya kizazi wa Jumuiya ya Afika Mashariki wa mwaka 2021.
Kupitia mkutano huo, Padri Ombeni alieleza kusikitishwa juu ya mauaji katika jamii kati ya wanandoa yanayotokea kwa kisingizio cha wivu wa mapenzi jambo alilosema ni ouvu na linapaswa kukemewa kwa nguvu zote kwani linaingilia Uhai ambao asili yake ni Mungu.
“Maandiko Matakatifu kupitia Bibilia yanaeleza kwa namna kuu mbili, juu ya thamani ya uhai katika Bibilia, Maandiko Matakatifu yanatetea uhai, hasa pale kwenye Agano la Kale, ambapo baada ya Mungu kumuumba Adamu na kumpatia msaidizi wake Eva, aliwabariki na kusema, enendeni mkazae na kuijaza dunia,”alisema Padri Ombeni.
Alisema pia kuwa uhai wa mwanadamu ni kitu kitakatifu, hivyo unapaswa kulindwa na kutunzwa tangu kutungwa mimba hadi kifo chake cha kawaida. Hivyo muswada huo wa Ujinsi na Afya ya kizazi haupaswi katika Mataifa ya Jumuiya Afrika Mashariki kwani unakwenda kinyume na Utu, Dini na tamaduni za watu hao.
Kwa mujibu wa Padri Ombeni Mswaada huo unatishia uwepo wa Dini na Imani za Watu wa Jumuiya ya Afrika Mashariki, pia unadhalilisha Mila na Desturi za watu wa Jumuiya ya Afrika Mashariki, kwani hautoi nafasi kwa wahudumu wa afya kutumia dhamiri zao katika kutoe elimu ya afya ya uzazi kwa wanaowahudumia.
Kutokana na hayo na mengine maovu yaliyoko katika Mswaada huo ambao umeakisiwa na kupigiwa debe na baadhi ya vikundi vyenye nia ovu na watu wa Jumuiya ya Afrika Mashariki, Padri Ombeni amewataka watanzania wote kuungana na wananchi wa Jumuiya ya Afrika Mashariki katika kuupinga Muswaada huo.
Mmoja wa Washiriki wa Mkutano huo, aliyejitambulisha kwa jina la Anna Anatoli alisema ulimwengu umekosa hofu ya Mungu na ndiyo maana imefika hatua wanadamu wanaweka mikakati ya kutowesha Uhai bila kuwa na hofu ya kwamba kazi hiyo ni ya kwake Mungu Muumba ambaye yeye ni asili ya Uhai wenyewe.
“Hatuna sababu ya kushabikia mambo kutoka mataifa ya mbali ambayo kwao wamefika mahali wameona Uhai si zawadi kutoka kwa Mungu kwenda kwa mwanadamu, natamani kuona tunabaki na vyakwetu huku tukiendelea kuwajengea hofu ya Kimungu watoto wetu,”alisema Anna.
Kwa upande wake Betty Sammaye aliwataka wazazi kusimama na kuwapeleka watoto wao Kanisani kwani Mtoto akikuwa kwenye uwepo wa kumcha Mungu ataweza kusimama na kujitetea na Neema ya Mungu itakuwa ndani katika kumwongoza.
Betty amewataka wazazi kuchukua muda kuzungumza na watoto wao, kwani vitu vinabadilika mno kila siku, na kamwe wasikubali watoto wao kutoka nje ya himaya yao bila kufahamu kwa kina ni wapi hasa wanakwenda na wanakwenda kufanya nini.
Muswada huo wa Afya ya Kizazi na Ujinsi wa Jumuiya ya Afrika Mashariki wa Mwaka 2021 unaelezwa kukiuka maadili, Utu na Dini za watu wa Jumuiya ambao una vipengele vinavyochochoa ngono kwa watoto na Vijana, na pia utoaji mimba.
Na ikiwa muswada huo utaachwa upite, basi itazilazimu nchi wanachama wa Jumuiya ya Afrika Mashariki kutunga Sheria kulingana na matakwa ya muswada huo.
NAIROBI, Kenya
Askofu Mkuu Hubertus Maria van Megen, Balozi wa Kitume nchini Kenya na Sudan Kusini, amewataka waamini kujitahidi kupyaisha nyuso zao na kujitoa katika huduma kwa wengine, ikiwa ni njia mojawapo ya kufanya dunia kuwa mahali bora kwa kila mtu.
Katika mahubiri yake wakati wa sherehe za kuitisha kwa ajili ya kuanza kwa Chuo Kikuu cha Tangaza mwaka wa masomo 2022/2023, Askofu Mkuu Megen, alitoa mfano wa Zaburi 104:30 na kuwataka Wakristo kubadili mienendo yao na kuishi kulingana na sheria. viwango ambavyo Mungu huweka katika Neno Lake.
“Mara nyingi tunaimba na kumsihi Roho Mtakatifu aufanye upya uso wa dunia, lakini vipi kuhusu uso wako? Kwa nini usiseme, “Bwana, itume roho yako na uufanye upya uso wangu?”
Askofu Mkuu Megen alisema kuwa ni wakati stahiki kwa waamini na wanafunzi hao kumwomba Roho wa Mungu kwa hekima na mwelekeo katika kutimiza malengo ya mwaka mpya wa masomo wa chuo hicho kinachomilikiwa na Wakatoliki.
Aidha, aliwataka Wakatoliki kumruhusu Roho Mtakatifu kuwaongoza katika utume wao, huku akiwatahadharisha kuhusu madhara yanayoweza kuepukika ya udhaifu wa kibinadamu, ambao mara kwa mara huwafanya kutafuta anasa za dunia.
“Wanadamu wana mwelekeo wa kuuumba ulimwengu wao usiolingana na kanuni za Neno; tunashawishiwa sana na ulimwengu na kuishia kuishi kulingana na mahitaji ya mwili,” alisema Askofu Mkuu Megan.
Askofu Mkuu Megen alihusisha zaidi Zaburi na amri kuu zaidi, akisisitiza kwamba ilikuwa njia pekee ya kupata ushirika wa kweli na Mungu.
Mwakilishi huyo wa Kitume alisisitiza mafundisho ya Roho Mtakatifu, kuhusu kumtumikia Mungu huku akizungumzia ongezeko la watu, wakiwemo wa kidini, kuingia katika makundi na matabaka ya kijamii.
Askofu Mkuu Megen alilielezea Kanisa kuwa ni taasisi ya kibinadamu inayoundwa na watu ambao, kama watakatifu, wanaweza kukabiliwa na kasoro za kibinadamu.
Mwadhama Polycarp Kardinali Pengo, Askofu Mkuu Mstaafu wa Jimbo Kuu Katoliki la Dar es Salaam, akimpatia Sakramenti Takatifu ya Kipaimara mmoja wa vijana waliopokea Sakramenti hiyo, katika Adhimisho la Misa Takatifu iliyofanyika katika Parokia ya Mtakatifu Imakulata, Upanga, Jimboni humo, (kulia kwa Kardinali) ni Paroko wa Parokia hiyo Padri Casmir Kavishe. (Picha na Mathayo Kijazi)
Na Mathayo Kijazi
Mwadhama Polycarp Kardnali Pengo, Askofu Mkuu Mstaafu wa Jimbo Kuu Katoliki la Dar es Salaam, amewasihi Waimarishwa wa Sakramenti Takatifu ya Kipaimara kutambua kwamba kwa sakramenti hiyo wanatumwa kuitangaza habari njema kwa Mataifa.
Kardinali Pengo aliyasema hayo hivi karibuni wakati akihubiri katika Adhimisho la Misa ya kutoa Sakramenti Takatifu ya Kipaimara kwa vijana 37, iliyofanyika katika Parokia ya Mtakatifu Imakulata, Upanga, Jimboni humo.
“Ndugu zangu mnaoimarishwa leo katika Sakramenti hii Takatifu, tambueni kwamba mnapopakwa mafuta, mnatumwa kwenda kuifanya kazi ya Mungu ya kuitangaza habari njema kwa Mataifa, yaani mnatumwa kuwatangazia masikini habari njema,” alisema Kardinali Pengo, na kuongeza,
“Masikini hao wanaotangaziwa habari njema, siyo umasikini wa kukosa fedha, kwa sababu kama ni umasikini wa fedha, hata Yesu Kristu mwenyewe alikuwa ni masikini.”
Aidha, Kardinali Pengo aliwasihi vijana hao kufahamu kwamba hata kama ni masikini na wenye kujiona kuwa hawana thamani maishani mwao, lakini Mungu hajawaacha, hajawatupa na wala hajawalaani.
Kardinali Pengo aliongeza pia kuwa heri watu walio masikini ambao wanamtegemea Mungu, kuliko matajiri ambao wanadhani kwamba wana kila kitu, na hivyo hawahitaji uwezo wa Mungu katika maisha yao.
Alisema pia kuwa kuitangaza habari njema ni pamoja na kuyaishi Maandiko Matakatifu, kwani mtu hawezi kuitangaza habari njema kwa kutenda kinyume na mafundisho ya Mungu.
Kardinali Pengo aliwasihi wazazi na walezi kuwasindikiza watoto wao katika kumsifu na kumtukuza Mungu, ili waendelee kudumu kuwa Askari hodari wa Kristo.
Kwa upande wake Paroko wa Parokia hiyo, Padri Casmir Kavishe alimshukuru Mwadhama Polycarp Kardinali Pengo kwa kufika Parokiani hapo na kuwapatia Sakramenti hiyo Takatifu vijana 37 katika Adhimisho hilo la Misa Takatifu.
Padri Kavishe aliwashukuru Makatekista na waalimu wote walioshiriki katika kuwafundisha vijana hadi kuwa imara na kuweza kupokea Sakramenti Takatifu, huku akiwasihi vijana hao kuendelea kudumu katika yale yote waliyofundishwa.
DAR ES SALAAM
Na Mwandishi wetu
Wadau na Watetezi wa Uhai kutoka Shirika la Kutetea Uhai, Pro-Life Tanzaania, wamesema kwamba mengi yaliyoandikwa katika Barua ya Kichungaji ya Baba Mtakatifu Yohane Paulo II (Familiaris Consortio 1981) kuhusu Nafasi ya Familia katika Ulimwengu wa leo, hayaonekani katika maisha halisi, kwani dunia ya sasa ni ya kizazi kipya.
Hayo yamejiri katika Kongamano la Shirika hilo liliofanyika Jijini Dar es Salaam, na ambalo lilijadili barua hiyo ya Kichungaji.
Katibu wa Pro-life Tanzania, Godfrey Rahabu Mkaikuta amesema kuwa maisha yamebadilika, hivyo wamefikiri ni vema kupeleka ujumbe wa barua hiyo ya Kichungaji kwa vijana, na hivyo wamelenga kuanza na Vijana katika Vyuo Vikuu.
Alisema pia kuwa mpango huo unakusudiwa kuanza kutekelezwa mapema Januari mwakani katika Vyuo vya Kati, Vidogo na Vyuo Vikuu vya Kanisa Katoliki, na tayari wameshajipanga katika makundi namna ya kufikia Vijana hao katika Vyuo.
Mkutano huo uliokuwa ukijadili Insikliko ya Baba Mtakatifu, ulishirikisha watetezi wa uhai kutoka nchi za Tanzania, Kenya, Uganda Zambia, Zimbabwe na Rwanda, uliotanguliwa na Misa Takatifu wakati wa ufunguzi iliyoongozwa na Askofu Msaidizi wa Jimbo Kuu Katoliki la Dar es Salaam, Mhashamu Henry Mchamungu.
Askofu Mchamungu aliwapongeza watetezi hao wa uhai kwa juhudi na hamasa kubwa wanayofanya katika kutetea uhai bila kuchoka wala kukatishwa tamaa, na hivyo kuwataka kuendelea na moyo huo bila kuchoka.
Katika mahubiri yake, Askofu Mchamungu alieleza umuhimu wa ndoa na familia katika maisha ya binadamu, kwani familia lazima imsaidie mwanadamu kutambua wito wake mwenyewe, na kuishi kadri ya maongozi ya Mungu.
Kanisa lazima litambue muhimu wa kuweka programu zinazolinda uhai, na kustawisha ndoa na familia kwa ajili ya ustawi wake, na pia ustawi wa taifa kwa ujumla wake.
Radio –Television Tumaini, also trading as Tumaini Media, consisting of Radio Tumaini, a weekly newspaper “Tumaini Letu” and a Television Station “Tumaini Television” is owned and run by the Archdiocese of Dar es Salaam, Tanzania since 1994.
+(255) 238-4131
info@tumainimedia.co.tz/p>
